improvisadores 1928

collega, a cuntemplare ti cumbido

su mamentu fatale e de terrore.

In ojos de s’isposa ido s’amore

ma totu s’essser meu in mamma ido.

In s’estremu mamentu mi detzido

de salvare s’afetu superiore

de mama chi a su mundu m’at batidu

e fatu mannu, educad’e nudridu.

Beru, chi morzet un’ispos’adoloridi

lutat sa domo de dogni manera,

ma s’in cussu perigulu li moridi,

s’isse cheret nd’agatat un’atera.

Su fizu naschet creschet e fioridi

in sos benujos de sa mama vera

e si la perdet pro mala fortuna,

atera non bind’at, sa mama est una. 

S’amor’e mama non at assimizu,

non b’at tesoro de l’ugualare,

Deus valdet de dannu o de fastizu

o disgrascia chi podet capitare.

In ojos de sa mama pro su fizu

devet sa prima lagrima ispuntare,

s’isposa li ded’aer vera istima

ma sa mama in sas penas pianghet prima.

Sa mama est sa lanterna luminosa

ch’in ogni passu su fizu guidat,

est lughe risplendente e virtuosa

chi s’intelletu pro su bene ischidat,

costante, educadora in ogni cosa,

lu cunsizat l’adorat, non lu fidat,

l’ajuat in sa vida materiale,

lu rende forte in sa vida morale.

Eo salvo s’isposa eleta e cara

ca in issa apo fissa ogn’isperantzia.

L’amo cun totaganta s’importantzia

 fino a cando mi ponen in sa bara,

ca cun sos dulches risos de sa lara,

cun s’amore sa fide, sa costantzia

mi fateit felice ca est magnanima,

dendemi vida, coro, idea e anima

A mamma deo rispeto e adoro

che-i su sacramentu intrend’a missa.

Prite m’at partoridu e non l’ignoro

e pateit pro me costant’e fissa,

ma s’isposa m’at dadu anima e coro

coment’anima e coro dei a issa.

Duncas, su primu postu est riservadu

a chie coro e anima mi at dadu.

L’amo da-i su coro a tot’impignu

s’anghela mia cara e tutelare

ca daghi enzo dae trabagliare

mi dada afetuosu unu carignu

e mi faghet in parte ismentigare

de dogni pena s’impetu malignu

e deo custa fita mia e sorte

non chelzo cumpensare cun sa morte.

Che naufragu in mal’andada barca

s’omine diat eser infelice

si un’isposa nobile e felice

non che pigheret de  s’amore a s’arca.

Immortalat a Laura, Petrarca

e immortalat, Dante a Beatrice.

Cantan sa mama nobile e costante

ma a su chelu che pigan s’amante.