Dae como addainnanti

Cand'apo a bider faulas tuncende

chi atitan ingannos in corrutu,

ajuo deo puru pibiende

chin su fintu sentidu in disabutu.

Sas barras afianzo in su cugutu,

pro chi a bortas, no m'idan riende,

ma mustro sas pupias irrujende,

sighende pantomina risolutu.

Faghet bai sa ghia comunale,

maresciallu, preideru, avocadu,

su cupanzu, s’amigu, su carrale.

Ca viver tra s’umanu cumitadu

chena resare istima naturale;

caru meu ses bellu che inculadu.

                        x x x

Prima bi fit su malu nominadu

o inditadu a arte e a tot'ora,

ca faghiat sa critica indignadu

de sa mustrenga classe ghiadora.

Gai dissignan  oldinzos intr'e fora

pro chi rebelde seret isoladu

dae caridadevole dimora,

chi dat su così-sia a s'ighinadu.

Su clero, chena cherrer, favoriat

a dolumannu, custa costumantzia

crastende puddu cando cantaiat.

E isse chena pia nominantzia,

sas rimas de su cantu ch'ingulliat

lassende-lis cantare s'arrogantzia.